منتديات ثورة الرومانسيه




 
الرئيسيةاليوميةمكتبة الصورس .و .جبحـثالأعضاءالمجموعاتالتسجيلدخول
أهلا وسهلاَ بكم جميعآَ أحبآبىٍ أعضآء ومشرفَين وإدإريينٍَ وزوارَ  " منتدَيآت (  ثـَُوَرةَ , الروَمآنَسيه  ) " .. فـ بيتـكم الثآنى .. نتمنىَ أن نقدرَْ نفيدكمٍَ ونستفآد من َ خبرَاتـكـمٍ .. حيآكمٍَ جميعآَ أحلى أسَرٍَة وأٍَُجدَِع أصحآٍَب
: أخي الكريم بصفتك أحد ركائز المنتدى وأعضائه الفاعلين ، يسر الإدارة أن تتقدم لك بالشكر الجزيل على جهودك الرائعه .. وتأمل منك فضلاً لا أمراً المشاركة في أغلب الأقسام وتشجيع كافة الأعضاء بالردود عليهم والتفاعل معهم بقدر المستطاع .
قريبا استرداد نشآط المنتدى
( اللَّهُ لا إِلَهَ إِلَّا هُوَ الْحَيُّ الْقَيُّومُ لا تَأْخُذُهُ سِنَةٌ وَلا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلا يَؤُودُهُ حِفْظُهُمَا وَهُوَ الْعَلِيُّ الْعَظِيمُ ) [البقرة:255]
جـآريَ آعــآدَه استـرداَد نشــآطَ المنتديَ 

شاطر | 
 

 ظلال الحب (روايه قطريه )

اذهب الى الأسفل 
كاتب الموضوعرسالة
ahmed

avatar

العمر : 24
عدد المساهمات : 376

مُساهمةموضوع: ظلال الحب (روايه قطريه )   الجمعة فبراير 12, 2010 11:08 am

بنات هالروايه عايشه داخلهم طفوله وبرأه وحب للحياة وراح اسرد لكم هالقصه
واتمنى تعيشون مع روايتي أجوائها بحلاوتها ومره

بطلتنا اسمها (( العنود)) وباقي شخصيتنا بتعرفونها مع سردي لأحداث هذي القصه


اليوم الاحد التاريخ 11-1-2007 الساعه 11 الظهر شله بنات جالسين ضحك وقهقهات عاليه وريحة النسكافيه والدونت الحاره والجو البارد وصوت دافي يغني

لــ أبو نوره :
اشتكي لوسادتي دنياي واسمعها تنوح
كنها بعضي وبعضي وينهو منهو معه

آآه ياجود الحزن وياي وفي الفرحه شحوح
ضايع(ن) بهمومي الغبره بوسط المعمعه

واسمحيلي يالغرام .........


لبنه :يسلم هاصوووت دنتي بنت صوتك توووحفه

شيخه : اسم الله على بنت خالتي صكتها هالمصريه بعين العنود يعورج شي؟؟؟؟ ترى هالمصريه ما تعطي خير تذكرين القلاده نتفتها لي راحت العنود ياخاله أم سعود راحت بنتج>>>>> العنود وشيخه بنات الخاله
بنات :ههههههههههههههههههههههههههههههههههههههههههه
شيخه :ملل ملل قاتل امشوا انروح فيلاجيو المحاضره الثانيه الساعه 3 واللحين 11 خلونا نتغداء ونرجع بنات يله
لبنه : لا لسه باقي لي أنا محاظره استنوني عيب عليكم >>>>> مصريه مواليد الدوحه
شيخه :واحنا بنستناكي انشاء الله لا يا أمي انسي انا طفشانه ابي اروح اشم هواء قبل ليجي اخوي المصك وياخذني للبيت 
العنود :طيب يا شيخوه وين روح فيلاجيو ؟؟
طرفه <<<< مطوعة الشله :لا خلونا نروح الكفتريا اللي في المبنى الثاني بنات اخاف حد من عيال عمي يشوفنا
شيخه :لو سمحتي لو انتي خايفه انثبري مكانج انا مالي خلق افلام هنديه مع عيال عمج ولا قبيلتكم المتحجره هذي
العنود : يله نطلع بنات انا كلمت اليمو <<<<< ليموزين

طلعوا البنات معاهم طرفه ولبنه اللي في البدايه اعتذروا راحوا لفيلاجيو

وقي فيلاجيو
شيخه :بنات ياحلات هالجينز شوفي طروف طرفه وصمخ شوفي عيونج تتلاقط برا يلعن ابو الخوف كل هذا ذل من هلج
طرفه :ياختي انتي ماجربتي العقال على جنبس ولا عرفتي ياذا الحظريه السايبه
شيخه :بل عقال مره وحده
لبنه :ايه ده بصي يا شيخوه حاقه جنان بصي البدي يخبل علي مب شديه
شيخه :يا شينج ((( مب شديه )) يقولون مب جذيه
العنود :بنات بنات طررررووووف شيخوووه لبنوه تعالو <<<<<< تصوت عليهم من غرفة الملابس
البنات :واااااااااااااااااااااااااااااااااااااااااااااااا اااااااو
شيخوه : يابختج يا عندوه كل شي عليج يخبل يختي انا لو ذا الكريشه انا بخير
لبنه :بصي ياشيخوه لو انا اللي اولت كده كان طأتيني وأولتي انتي بنت نضاله
طرفه :العنود دشي شوي داخل خبله واقفه في الممر
العنود: يااااااااا عزيزتي اللحين ما فيه حد في المجمع فاااااااضي
طرفه : بدلي طيب خلينا نمشي نطفح ونرجع يله بنات
راحوا البنات بأحدى المطاعم اللي بالمجمع وطبعاً شيخه ولبنه نسوان رجل طول القعده خنااااااااااااااق وهواش
العنود رن جوالها :ألووووو مرحبا هلا دانه أي انا في فيلاجيو خير وانتي شدراج
اها طيب سلمي عليه بااااااي وصكرت الخط بعصبيه

شيخه : شصار لج دخني مره وحده ؟؟؟؟؟؟؟؟
العنود :دانه بنت عمي سلمان تقول عزوز اخوها داق عليها يقول دقي على العنود واسأليها هي اللي في فيلاجيو
قلت لها اي وسلمي عليه

شيخه :طيب وين العصبيه في الموضوع
العنود :اسلوبها ينرفز ياربي كيف هذا ولد عمي دانه حبوبه بس دام هذا اخوها انا اكرهم
شيخه :اذكري ربج
العنود لا أله الا الله محمد رسول الله ياربي صبرني على هالعايله
طرفه :ياربي خلصونا انا شبعت
العنود:طيب طيب قمنا بنات
لبنه:طيب انا عوزه حلو احلي بعد الاكل
شيخه:يالله يابنت العز لازم تحلي اقول قومي لا ارفسج رفسه الا انتي بالجامعه قومي يا ام الحلو قال تحلي قال ههاي قومي يله
طرفه: ياربي فضحتونا اصواتنا عوره قومن بسكات
العنود تنبش بشنطتها الا بصوت غليظ فيه من الحده يقول لها الشيخه المفروض هالوقت تكونين بالجامعه
تشنجت اطرافها وتمت عيونها بالأرض مصدومه من الصوت هذا هو أي هو عبدالعزيز بن سلمان الـــــ..... ولد عمي
التفتت بكل برود العنود:خير الشيخ ؟؟؟
عبدالعزيز:أظن سمعتيني يا بنت عمي !
العنود : والخوف بدى يغزي اطرافها أي سمعت بس انت شعليك اكون هنيه ولا هناك انا حره يا ولد العم
عبدالعزيز والشرار بدى يطلع من عيونه ويصك بيده لين بينت عروقه كأنه تزيده شحنة غضب على اللي قدامه
: أقول خمي ثرج وروحي جامعتج وعن التسكع لا تشوفين شي ماشفتيه يا عنود
العنود :والخوف تمكن من قلبها قالت له طيب انا طالعه اصلن لانه مو عد المحاظره قرب ترى مهب خوف ياللي عامل فيها بودي قارد بس تدري مب شينه انك تكون بودي قاردي >>>>>> تبي تزتفزه
عبدالعزيز : يحس بطعم الدم في اسنانه من الغيظ اقول اطلعي لا اخليج تتحسفين انج دخلتي ذا المجمع ودليتي طريقه
العنود :طيب طيب بشويش على اعصابك ههههههههههههههههههههه طالعه بمزااااااااااج مب خوف >>>>> كذابه ميته من الخووووف

راحت قدام عندالبنات اللي يطالعون الأحداث من بعيد عند الباب
شيخوه : عنود والله انا قلت بينتفج
طرفه :عنبو غيرس انتي ما تستحين واقفه اداحرين الرجال
لبنه: بت بت العنود من القمر اللي كان معاكي حرام حد بيتخانق مع واد زي ده ياخرابي بصي يالهوي حيغمى عليه انا عوزه واحد زي ده
العنود :اخذيه وفوقه بوسه مني وافلوس اذا تبين
شيخه :يا أم الكشري الحين ما حلا في عينج الا عبدالعزيز صج صج عندج طموووح
طرفه :استغفرك يارب واتوب اليك ياربي لاتعاقبني هذولا خبلان اما انا ياربي خايفتن من عقابك وحده اداحر الرجال وتراددده ووحده تتغزل فيه ياويل حالي انا وش مجيبني
العنود :بنات انا بروح البيت نفسيتي تعبانه اخاف هالمجنون يخبر ابوي ولا اخوي سعود
شيخه :يخسي الا هو انا اشهد انه كنا في الجامعه وهو يكذب
طرفه :ياربي بعد شاهدات زووور لا لا هذا واااااااجد علي انا معادني بظاهره وياكن وانتي يا سودة الوجه يا شيخوه ان عاد سمعتس تقولين ملل لا اطر بطنس

وصلو البنات الجامعه وغطوا على غياب العنود اللي بعد مانزلوا البنات كلمت السايق وراحت للبيت وانهارت من البكي لين ناااااامت من التعب


الساعه 5 المساء في بيت العنود

صوووت ضربات الباب قويه وصوت ابو سعود العنوووووووووووود العنوووووووووووووووود
نطت العنود من فراشها متخرعه لا يكون فيه شي لايكون خبرهم عبدالعزيز بشي؟؟؟؟

اجمعت العنود قواها وقامت تفتح الباب
العنود :يبه هلا ((وقبلت راس ابوها))
ابو سعود: يابنتي اللي تسوينه غلط
العنود : تمت ساكته وتطالع ابوها بذهول تنتظر وشهو الغلط
ابو سعود:العنود يابنتي ما يصير كذا تاركه امج بروحها تحت تناظر الطوف وانتي نايمه ولا تسألين عنها جيتي من الجامعه ولا تغديتي معها لا وانا ابوج غلط صحتج وادري خاطري امج وبسج ارقاد لا صلاه وعباده غير راقده وبس
العنود :حست انه ماي بارد انكب عليها
سم يبه انا اللحين نازله وراك بس لاتزعل كم شايب مزيون عندنا مابه الا انت
ابو سعود: يالسانج الحلو طالعه على امج
العنود: هذا اللي يسمونه الغزل بيه
وصكت الباب خافت من ردت فعل ابوها
بس ابو اسعود تم يبتسم من حركة بنته الطفوليه وراح يتوضى ويستعد حق صلاة المغرب
العنود: دشت وانتوا بكرامه الحمام خذت شور سريع وتوضأت وصلت وقررت انها تبدل تبي تكشخ
طلعت لها جينز لو وست وتي شيرت كم طويل وهاي نك لونه أحمر وتكحلت وحطت قلوس بلون الكرز
وتعطرت
أم سعود : يالله بالعافيه تو الناس وانا امج
العنود :لبيه الزعلان وجات في اتجاه امها وهي تغني الحلوه زعلانه من يراضيها انا اراضيها وبروحي افديها
ام سعود الله يخليج لي يا شمعت البيت انتي
العنود يابختي انا من قدي انا فديت امي اانا
ام سعود الله يهديج كل كلمه عليها اغنيه
العنود :يمه حدبيجي اليوم صوبنا قهوه وشاي وكيك وفطاير وحركات يا ام سعود
ام سعود : أي حبيبتي اليوم مرت عمج سلمان وبناتها ومرت ولدها بيجون صوبنا
العنود : زين اني كشخت
ام سعود : أي وانا امج خليها ام خليفه تتحلى عليج وتشوفج يمكن يجون رسمي عشان خطبتج مع عبدالعزيز
العنود :يمه قسم بالله هذي السالفه طالت وامصخت انا هذا ما ابيه خلاص يايمه من عافني عفته
وصدقيني لو يغطيني ذهب من راسي لين رجلي ما خذته كرامتي يا يمه اهون عليج وتمت ام سعود ساكته ما ردت انكسر خاطرها على العنود وارحمت حالها ونظرة الانكسار في عين العنود اللي كسر قلبها حبيبها وولد عمها عبدالعزيز
جرحها نعم آلمها نعم بس تكرهه هيهات هالقلب يترك حبه لعبدالعزيز كأنه قلبها ضدها لو تقدر تنتزعه من مكانه وتتخلص من لعنة حبه
مر شريط الذكريات قدام عيونها يوم كان يفضي عبدالعزيز المكان لها عشان تلعب لوحدها لما كان يروح للبقاله عشان يشتري لها بحكم انه اكبر منها 9 سنوات
بس كانت تشوفه هو اللي يوقف في ظهرها لا تجيها ظربات الزمن على غفله
بس هو تغافلها وطعنها في الظهر نعم طفله على الحب بس كانت ترسم ملامح حياتها معاه بس انهى بأنانيته كل شي

ام سعود :العنوووووود يمه فديتج شبلاج
العنود : بعيون شارد وفيها بكي وحكي لا فديت روحج يمه انا بس مصطله شوي ما تقهويت وانا توني قايمه من النوم
ام سعود :يالبيه يا عنودي وتصوت ام سعود على الخدامه ((سوماااااااااااااااا سوووووووومااااااا ))
جيبي نسكافيه حق بنيتي
وقامة العنود وانثرت شعرها اللي واصل لي تحت خصرها تحاول تنثر وراه كل الافكار والذكريات المره
مهما كانت حلوه بس لها مراره بلحق لما تنحكى
شوي والا بصوت سياره عند الباب العنود قامت من كرسيها تحاول تشوف من بس السيارة رنج اسود مظلل كامل ؟؟؟

العنود : من يمه سيارته رنج اسود ؟؟؟؟؟؟؟؟؟
ام سعود : ما ادري يمه بس سيارة اخوج سعود في الوكاله يمكن جاي بسيارة حد من ربعه
العنود : اااااااااااااااااخ ياربي شنو هالحظ وبحركه سريعه ردت الباب بسرعه وبصوت يرتجف حيالله بخالتي ام خليفه مرحبا تفضلوا
ودخلت ام خليفه واللي معاها طبعاً دانه زعلانه من حركة العنود لما سكرت في ويها
دخلوا الجماعه بس دانه تمت واقفه اطالع العنود بنظرة عتب راحت العنود لمتها
العنود يزعل العالم ولا تزعل حبيبتي دندونه
دانه : قولي قسم عاد انا تسكرين في ويهي يادبه زين ما ادوس في بطنج اليوم
العنود : انزين دشي الصاله الصغيره خلي الحريم مع بعض بالمجلس
دانه : لا حبيبتي انتي دشي نادي امج عبدالعزيز يبي يسلم عليها
العنود : شعنده واصل اخوج اليوم
دانه : بعد لعلي اراهم او ارى من يراهم ههههههههههههههههههههههه
العنود : انطمي يعلج العافيه صج سخيفه بروح انادي امي
العنود :يممممممممممممممه يممممه
ام سعود :هلا يمه خير ؟
العنود : يمه ولد عمي يبي يسلم عليج برا
ام سعود: فديت خليفه واصل بالارحام
العنود: لا يمه عبدالعزيز
ام خليفه : خليفه مسافر يا ام سعود راح يعرض تقارير مريم برا
ام سعود : ياعله يرجع سالم لاهله ومرته ويرزقهم بالخلف الصالح
ام سعود البست عبايتها وراحت تسلم على عبدالعزيز اللي متشخص وريحت دهن العود فايحه منه وكان لابس ثوب اسود وغتره شال كان الجو باااااااااارد ولما اطلعت له ام سعود سلم عليها وسأل عن العيال قالت له انهم في المجلس وستأذن منها وراح للرجال بالمجلس
اما في مجلس الحريم

دانه : العنود خلينا نروح غرفتج احس السوالف مللتني
العنود : طيب انطري شوي ونقوم
أم سعود : الا يا أم خليفه ما علمتيني وش تقارير مريم اللي موديها خليفه
ام خليفه : تقارير مريم اللي من المستشفى يقولون انه اذا الوحده تمت 5 سنوات ما حملت يرسلون تقاريرها برا بس خليفه مستعجل راح اهوا بنفسه يخلص الاوراق
مريم : والله ياأم سعود كل شي بيد رب العالمين بس خليفه ملهوف
ام خليفه ملهوف؟؟ وانتي لايمته هذا 3 اسقاط لج وانتوا متزوجين من 7 سنوات شلون ما يصير ملهوف
مريم انسانه هاااااديه الطبع الله بلاها بأنه الاطفال ما يعشون لها من تدخل 3 شهور يموت
وبس الله عطها رجال موت في ثراها مريم جمالها طبيعي يعني بنت كيوت شعر كاريه بني بشره بيضه بيبي فيس على مايقولون
العنود حست بغصت مريم : ميمي ياقلبي تعالي بوريج الملابس اللي جابها اخوي نايف لي
نايف اخو العنود الوسطي يدرس في كندا واخوها الصغير علي بثاني ثنوي وسعود الكبير طبعاً
قاموا البنات فوق ومريم كاتمه العبره
العنود : دانه تعالي عاونيني انزل الصندوق
دانه : يااربي مثقله
العنود: طيب شوفي اول واحكمي يستاهل ولا لاء ؟
العنود حست انه مريم فيها شي وهي توريهم الاغراض دانه انهبلت من الشوز والبديات والميك اب
العنود: مريم !!! لا تضايقين من كلامهم نرى الحريم الكبار كذا يقطون الكلام بس بدون قصد
مريم انفجرت بكى : لا يا العنود الناس تتكلم ها مابه شي بطريق انا ويش اسوي انا عايفه الاولاد انا متشفقه لي على طفل يقولي يا ماما ويقول لخليفه يايبه العنود انا احب خليفه بس الله مو كاتب انا اموت من اشوف اللي معرسين معي عندهم 3 او 4 انا بشر ياناس ارحموني كلامهم يقطعني واموت لما اشوف خليفه يحضن طفل مو من صلبه يلعب معه العنود و دانه منصدمين من انهيار مريم وغرقت مريم بدموعه اللي تلونت بلون كحلها
في صالة الحريم
أم سعود : يا أم خليفه اقعدي للعشى !!! ترى ماينشبع منج وانا وخيتج
ام خليفه لا فديتج انا بروح وراي موعد ابرة السكر ما خذتها
خلي احد يصوت لي على مريم ودانه
ام سعود : ابشري (( سوووووما )) تعالي روحي نادي بنت فوق
سوما : ماما العنود يقول اذا انا ريحه طبخ انا ما يطلع فوق ماما انا شنو سوي بنت مال انتي عوبه
ام سعود : الله يقطع هاللسان روحي قولي ماما قالت لي
سوما : جين ماما انتي مسؤول
راحت سوما الشغاله ونادت البنات ونزلوا بعد ما العنود هدت مريم وخلتها تفرفش
العنود : متى بيجي رجلج مريم ؟؟
مريم : بكره الساعه 10 بالليل !! ليش
العنود : جهزتي شي ؟
مريم : لا اجهز ايش
العنود : حركاتكم انتو وتغمز لها
مريم كانت بطيح من الدرج من كثر الحياء
اضحكوا عليها البنات ((ههههههههههههههههههههههههههههههههههه))
العنود : خلاص اجل خلي ترتيب الغرفه واللذي منه علي وببيض وجهج
دانه خلاص وانا بعد بساعدكم
مريم : وخدودها حمرت طيب طيب انزلوا اللحين وبينا الو
وطلعوا بيت أم خليفه الساعه 8 ونص
وراحت العنود تشوف موبايلها
الا البنات مقجرينه لها و5 مسجات من شيخه 3 مسجات من طرفه و اتصال من لبنه
العنود : الووووووو السلام عليكم يا أم الزين
شيخه : شدعوه متصلين الديوان الاميري عشان حضرتج تردين ؟؟
العنود : خخخخخخخخخخخخخخخخخ لا فديتج امري شهالتصالات والمسجات
شيخه : يالبقره باجر عيد ميلاد ظبيه وما خذت لها شي
العنود : ويه طيب خلاص انا عندي علبة مكياج ماركه شانيل ما بطلتها مع عطر بغلفها وبعطيها ما يمدي نطلع الساعه بتصير 9
شيخه : خلاص عيل انا بطلع اخذ لها شي من فيسز وبرجع ادق لج الا تعالي ليش مارديتي
العنود : بينت عمي سلمان كانوا عندنا
شيخه : كذاااااااااااابه يخطبون الله وناسه متى الخطوبه وين الحفله يختي شفصل ووين افصل
العنود : هي انتي يا رجه مخج فيه شي ؟؟؟؟؟؟؟؟ انا اقولج زارونا الله يخلف عليج
شيخه : أي أي زياره على الطاير ؟؟
العنود : أي وياليتهم ما جوا شيخوه تتوقعين من جابهم وانا نطيت في وجهه كني بومه
شيخه : من ؟؟؟ لا لا لا لا تقولين
العنود : والله ياشيخاني بغيت اموت من الفشيله
شيخه : جب جب فشيله أي فشيله وانتي اليوم الظهر اداحرين الريال في المجمع
العنود : شيخوه انتي انسانه فاضيه وانا غلطانه اقعد اسولف معاج تدرين صكي بكلم طروف ولبنه انتي يله طيري
بااااااااااااااااااااااااااي يا قمر
وصكت الخط بوجهه شيخه وهي تتنهد ودقت على طرفه مسكر <<<<<<<<< حركات البدو من الساعه 8 يغلق الهاتف وراحت تدق على لبنه ماترد
نزلت تعشت مع امها وطلعت غرفتها
تسترجع اللي صار اليوم تشوفه مرتين وتتكلم معاه تذكرت السالفه اللي ابعدته عنها وتنهدت ليتك ما غلطت يا عبدالعزيز اخ كنت اقرب لي من وريدي كنت اتنفسك كنت اتخيلك لكن غدرت بحبي لك
وغفت عينها على وسادتها اللي تضم دموعها واسرارها



الساعه 6:30 ص يوم الأثنين : صوت المنبه يرن العنود من كثر ما الجو بارد مو قادره ترفع ايدها تطفيه وبعد ما رن المنبه لين ماسكت ورن ثاني وثالث كانت الساعه 7 نطت عنود من الفراش وهي مختبصه

((( الجااااااااااااااااامعه ))) محاظراتي
وبلمح البصر دشت خذت لها شور داااااااافي ولبست جينز ( سكني ) كحلي غااامق ومعاه كنزه فوشيه
ونشفت شعرها بسرعه وارفعته بكلبس كحلي ولبست عبايتها وشيلتها والصندل بالأيد مع الشنطه الكحليه الجينز
وركض على الدرج
سلمت وطلعت على طووووووووووووووول
ام سعود : العنود تعالي العنوووووووود >>>>>>> لاحياة لمن تنادي

اركبت العنود سيارتها الكدلك متجهه الى الجامعه رن موبايلها
العنود : صباحوووووو يا حلو
شيخه : هلا عنودي وينج ؟ ساعه انطرج المحاظره بعد ربع ساعه
العنود : يا ماما راحت علي نومه زين لحقت يله دقايق وجايه لا تدخلون لين اجي البنات جوا
شيخه :أي يا قلبي كلهم هنا وفي خبر حلووووو تعالي بنعلمج
العنود : خير !!!
شيخه : يالملقوفه تعالي وبتعرفين
العنود طيبه جايه
العنود بعد 10 دقايق وصلت الجامعه وكانت تمشي بخطوات سريعه كان شكلها رسمي نضاره سوووده LV
والقلوس اللي حطته بسياره كان وردي وخدودها حمررره من البرد بس كانوا البنات اللي بالممر يتكلمون عنها بشينه اسمعتهم بس طنشت لين اطلعت لها وحده من البنات
اقول سوق الجمعه قام يجيب ملابس نظيفه <<<<<< (( احدى البنات اللي لهم عداوه مع العنود من ايام الثانويه )) واسمها انجود كانت من عايله غنيه جداً جداً يعني طبقه مخمليه
العنود استوقفتها هالكلمه : وبظره حااااااده منها ((( شفتي كيف عاد السوق اللي لبسك لبسنا يا انجود ))
وجدي الله يرحمه قالي حكمه ما كنت اعرف معناها بس اليوم عرفتها تدرين وشهي ((( القافله تسير والهو هو هو )) مافي داعي اكمل لاني ارقى من اني افتح نقاش مع وحده تافهه مثلك يا تشاااااااااااو
انجود : انا بوريك انا الهوهو انا ؟؟؟ طيب يالعنود ان ماحرقت قلبك وكرهتك بالجامعه
العنود : ياماما خفت قالت هالكلام وهي معطه انجود ظهرها وتتمخطر يمين وشمال تبي تنرفزها
دخلت المحاظره متأخره بس الدكتور مالاحظ تأخره كان توه فاتح سجل الحظور والانصراف المهم راحت جلست جمب شيخه بنت خالتها كانت متحمسه تبي تعرف السالفه اكتبت على ورقة النوت اللي قدامها
العنود : شيخه شسالفه ؟؟؟ شنو الخبر
شيخه ردت بنفس الطريقه كتبت على النوت : ملكة طرووووف يوم الخميس
العنود: وبصوت مسموع كذااااااااااااااااااابه
الدكتور زهري :: يابنت انتي اطلعي برااااااااا اخ منك يالعنود مغلباني برا انتي وشيخه >>>>> الدكتور سوداني
شيخه : يادكتور روق وهد اعصابك وتوبه ما تعيدها
الدكتور : طيب اجلسي بعيد عنها انا مارايق ليكم
العنود وشيخه : انشاء الله
بس ما جازوا كملوها مسجات موبايل لين خلصت المحاضره بعد عناء طلعوا للكفتريا الشله لبنه وطرفه والثنائي شيخه والعنود
العنود : طروووووف فديتج بتعرسين يا بعد جبدي والله عرروستنا البدويه
شيخه : أي والله بس تتوقعين من بياخذها ؟؟؟
طرفه : شيخوووه جعلس الطرم اقصري صوتس فضحتينا في الحرم الجامعي جعلس العمي الكل ترا بي
شيخه :لا لا طروووف الألفاظ هذي انسيها بليز انتي اللحين بتاخذين واحد هاي كلاس بليز هاه عشاني غير الألفاظ
طرفه والله مهوب كيفس ولا بكيفه يبغاني كذا يامرحبا ما بغاني محدن اجبره تسمعيني يا ام الاالفاظ انتي
لبنه :يخرابي شيخوه دي لو ما لقتش حد تتهاوش معاه تتهاوش مع ذبان وشها
شيخه : اسكتي انتي كلام منكس خليجي على مصري على مدري وشو قاموس خاص لج انتي
العنود : طرفه !!
العنود وعيونها كلها ادموع قامت ولمت رفيقة دراستها من 10 سنوات وهم سوى ما اول اعدادي وهم نفس الشله
واللحين أخر سنه بالجامعه ياااااااااالله صج السنين تركض
راحوا البنات كل وحده طلعت اللي بخاطرها من بكى وضحك ووناسه وقعدوا يتناقشون عن اللبس والميك آب واللذي منه يعني التحضيرات اللازمه
وبعد الساعه 12 خلصت المحاضرات وطلعوا البنات من الجامعه واتفقوا يوم الاربعاء يرحون السوق عشان يجهزون للملكه

العنود طول الدرب للبيت تسمع

لعبدالمجيد عبدالله

بريحك مني خلاص واغيب عن عينك
مادام هذي رغبتك لازم احققها
وبطلب طلب الله لا يهينك قلي أحبك حبيبي
خاطري اسمعها
اطلعت تنهيده قويه منها تحاول تخفي حزنها وصلت للبيت بعد ما تغدت جلست مع سعود اخوها العود وعلي الصغير وامها وابوها
العنود : باباتي تبي شاي
سعود: ياشين الدلع
العنود: باباتي شوفه شيقول
ابو سعود :ماعليج منه غيره وانا ابوج تدلعي ولا يهمج دامي حي
العنود: ياعل عمرك طويل يانظر عيني
ام سعود : اعقلي يابنت ولاتتهاوشين مع اخوج راسي يعورني
العنود : ام سعود هذي غيره >>>> وتغمز عينها خلاص ماني بقايله شي
ام سعود : اقعدي بس خليني اكلم سعود ماعندج سالفه ،، يمه سعود
سعود: لبيه
ام سعود : يمه تذكر السالفه اللي قلت لك عنها !! وتغمز له هاه تذكر وانا امك
العنود: السالفه والسالفه قولي له عن الخطبه وخلاص يعني ما ندري علاوي حبيبي اخوك بيتزوج وبنرتاح منه
علي : اللي كان مشغول بالقيم بوي اللي بيده (( الله كريم واخذ ملحقه ))
العنود : ياتفكيرك المادي
ام سعود : أي بخطب لوليدي عيل اخليه كذا هاه وانا امك شقلت
سعود : يصير خير
أم سعود : طيب من في بالك
العنود تذكرت شيخه : يمه ليه تروحين بعيد شيخه بنت خالتي شبلاها ماتشتكي من شي طيبه وحبوبه وجميله ومنا وفينا
سعود : لا لا كله ولا هذي الرجه شيخوه هذي عقلها ناقص اللهم لك الحمد والشكر انا ظابط ورزه واخذ لي هاخبله
العنود تحمد ربها انه شيخه ماسمعت هالكلام ولا ماتت مكانها : الله يهداك ياسعود البنت شاريتنا
سعود : لا شيخه لا انا مستعد اتزوج بس شيخه لا انا ما سويت شي في دنيتي عشان تزوجوني شيخه الخبله
العنود: لو سمحت هي عاقله واعقل منك بس تدري انت اخسران اذا ما خذت وحده مثل شيخه وهي خساره فيك لانك ما تستاهلها
وطلعت العنود فوق والدم فار في راسها ليش ياربي انا ورفيقة دربي واختي اللي ماجابتها امي نصيبها مثل نصيبي
شيخه تحبه وهو مستخف بأهتمامها تحاول تكون ظريفه وتنكت عشان ادش قلبه بس ما توقعتك ياسعود انا ني اه ثم اه على حظج يا شيخه والله انج شيختهم بس ما عنده نظر

خذت العنود لها غفوه ليل الساعه 4 العصر قامت تكشخت <<<<<بتروح بيت عمها سلمان عشان مريم
لبست بنطلون اسود وبدي هاي نك ابيض واسود وعلقت على احلى رقبه قلايد لولو مع حلق لولو وخاتها >>>> من هدايا اخوها نايف وحطت كحل اسود داخل عيونها النجلا وحطت قلوس لونه وردي فاااااااااتح وبلاشر وردي ورفعت شعرها بشكل فوضوي ونزلت غرتها على جبينها وصارت راضيه عن النتيجه ((( جمال مبهر ))
طلعت من البيت بعد مااستأذنت من الماما
وهي على الدرب
العنود :الوووووووووووو دندونه حبي انا جايه لكم على الدرب هل من غريب في دياركم
دانه : لا مامن غريب مافيه الا انا ومريوم نطالع المسلسل
العنود : طيب القهوه لاني قعدت من النوم وجيتكم دايركت
دانه: موجوده فديتج بس تعالي لا تروحين الصالـــــــــ ......... طوطوططوووطط ياربي هالخبله تنطر زين بقولها لاتروح الصاله اللي داخل تجي منا لاحول الله
مريم: طيب يعني بتروح هناك مب لاقيه احد بتجي هنا
دانه: أي والله صاجه خليها تسوي رياضه هههههههههههه
مريم: حرام مسكينه أي رياضه بطن مالها مضمر وجوعاني الخصر يشكي انكساره على الردفين يعني البنت جسمها متناسق
دانه : بسم الله فصفصتيها مريوم ؟؟
مريم :اسكتي ابغي اتابع المسلسل
دانه طيب
العنود وصلت وكانت تمشي بغرور مشيت الطاوس اللي ظاهرها كبرياء بس باطنها نااااااااااااار وانكسااااااااار اخ ياعبدالعزيز هنا ضحكنا هنا طحت ومحد سمى على الا انت اخ عجلت بالخطوات عشان ماتشوف مكان انولدت فيه منها اصدق مشاعر
دشت الصاله اللي بوسط البيت
العنود: يو يو يو السلام عليكم .............. اممممم بنات وينكم ؟؟؟ يا خاله وينج السلام عليكم
ولا فيه احد يجاوب ، اها اكيد بصاله الثانيه برا طيب بفصخ العبايه والشيله وبروح صوبهم وحطت عبايتها على الكرسي معاها الشيله والشنطه وراحت تتمخطر في الممر وكل ما مرت على مرايه وقفت شوي تتعدل
دخلت على البنات الصاله
العنود : السلام عليكم
دانه ومريم : وعليكم السلام يا هلا زين دليتي احنا وين
العنود : الله شابين الضو وشاي الكرك ((اشاي بالحليب مشهور عند أهل قطر )))
دانه : حياج تعالي قربي بصب لج ، الا عنود شعندج على هالكشخه والل مب هينه حركات يا لدبه
العنود: بعض مما عندكم اذا ما كشخت لج اكشخ حق من
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ayamem3aak


avatar

العمر : 24
عدد المساهمات : 2311

مُساهمةموضوع: رد: ظلال الحب (روايه قطريه )   السبت فبراير 13, 2010 2:12 pm

يسلموووووووووووووووووووووووووووووووو


[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sadstory.yoo7.com
 
ظلال الحب (روايه قطريه )
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات ثورة الرومانسيه  :: الاقسام العامه :: منتدى القصص العام-
انتقل الى: